工作狂的生活只有工作，重視工作，為工作而工作，我唔想做依一種人。

最近一返到屋企，就會被空虛苦悶襲擊。無 mood 打機，無交談對像，上網上到悶，就算想 MSN 找個人 chat 下都唸唔到話題，好在重有音樂可以減輕依種感覺。但聽音樂又被人話嘈（明明最嘈係佢地….)，用 headphone/earphone 用得耐對耳又會痛。 打算早Ｄ訓，又根本無可能，成屋人都鬼死咁夜訓 ，又打機又睇電視又講電話，好嘈，我根本無可能訓得著。

唸住出街行下啦，但係無朋友陪。見到人地雙雙對對會難受，睇到鍾意野又覺得佢貴買唔落手，又多二手煙，又唔舒適，又嘈，又人多又迫。對自己又孤寒，唔會花費買野食好野，真係行足一日完全得個行字。同係屋企分別只係一個坐係度，一個慢無目的咁四圍行。

係工作時間，係公司會好Ｄ。同D同事一齊都叫做有講有笑；又有人認同自己(工作能力)，做事有目標，好易過時間。工作可以麻醉到自己，令自己無時間唸Ｄ傷心事／負面嘅野。有時做到真係唔想放工，但係唔得。放假就慘，都唔知做咩好，終日無所事事，又找唔到方法令自己過得開心Ｄ。我唔想咁樣，都唔知做野找到Ｄ錢用來做咩，唔知自己生存有咩野意思；我想做一個準時收工，放工之後過嘅係生活，唔係生屍走內；間中放下假同Ｄ朋友去玩下，而唔係無所事事等返工。

Blog